Ekipi monitorues i Aleancës Qytetare, në mënyrë të paparalajmëruar, vizitoi stacionin policor në Bijello Polje dhe konstatoi se në ambientet e ndalimit po shkelen në mënyrën më të rëndë të drejtat e personave të privuar nga liria.
Mobilieri i rrënuar, infrastruktura e amortizuar dhe kushtet higjienike nën çdo minimum të përcaktuar, e bëjnë këtë hapësirë plotësisht të papërshtatshme për qëndrim.
Fatkeqësisht, as gjatë vizitave në departamente të tjera të sigurisë në mbarë Malin e Zi nuk hasëm kushte dukshëm më të mira, por fakti që selia e Qendrës rajonale të sigurisë “Veriu” ndodhet pikërisht në Bijello Polje e bën situatën jashtëzakonisht alarmante. Në vend që të shërbejë si shembull i praktikave të mira, ky Departament është kthyer në ilustrim të neglizhencës serioze të sistemit.
Mungesa e vullnetit nga ana e autoriteteve kompetente për të përmirësuar situatën vërtetohet edhe nga fakti se zyrtarët policorë të Departamentit të sigurisë në Bijello Polje, përmes shkresave të brendshme, kanë paralajmëruar disa herë instancat përkatëse për kushtet e papranueshme, duke kërkuar hapa konkretë. Megjithatë, pavarësisht paralajmërimeve që vijnë nga vetë sistemi, ka munguar çdo reagim që do të përmirësonte situatën.
Një pasivitet i tillë institucional tregon një mungesë serioze të përgjegjësisë dhe dëshmon qartë neglizhencën kronike ndaj çështjeve që ndikojnë drejtpërdrejt në të drejtat themelore të njeriut dhe sigurinë e çdo individi.
Kujtojmë se për këtë vit është paralajmëruar një vizitë e re e Komitetit evropian për parandalimin e torturës dhe trajtimit çnjerëzor ose poshtërues (CPT). Megjithatë, shembuj si ky sugjerojnë qartë se shumica e rekomandimeve të mëparshme, përfshirë edhe ato nga vizita e vitit 2022, nuk janë marrë parasysh, dhe zbatimi i standardeve ndërkombëtare ka mbetur vetëm në letër.
Nga autoritetet kompetente presim një reagim të menjëhershëm dhe apelojmë publikisht që ambientet e ndalimit në Departamentin e sigurisë në Bijello Polje, për shkak të kushteve skajshmërisht të papërshtatshme, të nxirren menjëherë jashtë përdorimit.
